،وزیراعظم شاہد خاقان عباسی دا پاکستان امریکہ بزنس کونسل پاروں ظہرانے توں خطاب

نیویارک ۔ 20 ستمبر (اے پی پی) وزیراعظم شاہد خاقان عباسی امریکی کمپنیاں کوں آکھیا جو او پاکستان اچ سرمایہ کاری کرن،،جتھاں انہاں سانگے محفوظ ماحول ،دلکش منافع اتے انہاں دے ملک منتقلی کوں یقینی بنڑایا ویسی۔وزیراعظم شاہد خاقان عباسی دا پاکستان امریکہ بزنس کونسل پاروں ظہرانے توں خطاب کریندیں ہوئیں آکھیا جو پاکستان 2025ءاچ دنیا دی 20وڈی معاشی طاقتاں اچ رل ویسی،اوندی 60فیصد آبادی 30سال توں گھٹ عمر اتے 10کروڑ مڈل کلاس عوام تے مشتمل ہوسی۔ظہرانے اچ وڈی امریکی کمپنیاں دے سربراہان اتے نمائندے شریک تھےے۔وزیرآکھیا جو پاکستان اچ ہر طرح دا پوٹینشل موجود اے ،جئیں کوں تسلیم کیتے ونجنڑ دی لوڑھ اے۔انہاں گزریل رات استقبالیہ دے موقع تے امریکی صدر ڈونلڈ ٹرمپ نال ملاقات دا ذکر کیتا۔انہاں آکھیا جو امریکہ دے نائب صدر مائیک پینس نال تھیونڑ آلی ملاقات وی بہوں مفید رہی۔انہاں آکھیا جو امریکی قیادت دا پاکستان بارے رویہ بہوں مثبت اے اتے میں انہاں کوں یقین ڈوائے جو پاکستان دہشت گردی دے خلاف جنگ اتے آپنڑی سرزمین توں دہشت گردی دے خاتمے سانگے پرعزم اے۔وزیراعظم آکھیا جو پاکستان دی حکومت سرمایہ کاراں دی لوڑھ نا ل پوری طرح آگاہ اے۔انہاں یقین ڈوایا جو غیر ملکی کمپنیاں دی ساری لوڑھ کوں پورا کیتا ویسی۔وزیراعظم پاکستان اچ سکیورٹی بارے قائم خدشات کوں مکمل طور مسترد کریندیں ہوئیں آکھیا جو پاکستان اچ کئی امریکی کمپنیاں پہلے ای موجود ہن اتے او چنگا کاروبار کریندی پئین۔انہاں جنرل الیکٹرک دا حوالہ ڈتا جیڑھا جو پاکستان دے مختلف منصوبیاں تے کم کریندی پئی اے۔انہاں آکھیا جو امریکی کمپنیاں سی پیک اچ سرمایہ کاری کر تے بھاری منافع کما سگدن جئیں اچ چین 60ارب ڈالر دی سرمایہ کاری کریندا پئے ۔انہاں آکھیا جو سی پیک وسطی ایشیائی ملکاں سانگے نویں راستے کھولیسی۔نواں انفراسٹرکچر اتے توانائی دے منصوبے تکھے مکمل کیتے ویندے پئن ۔انہاں آکھیا جو ملک دے میکرواکنامک اشارےے بہتر تھیندے پئین۔شرح نمو4سالیں وچ 2.6فیصد توں ودھ کراہیں 5.3فیصد تئیں پج گئی اے جیڑھی جو اگلے سال 6فیصد تھی ویسی۔انہاں آکھیا جو 2018ءاچ 10ہزار میگاواٹ ودھیکی بجلی نیشنل گرڈ اچ رل ویسی جڈانجو بئے منصوبے وی زیر تکمیل ہن ۔انہاں آکھیا جو جدید لیکوئیفائیڈ نیچرل گیس ٹرمینل تعمیر تے قدرتی گیس دی لوڑھ کوں وی پورا کر ڈتا گئے ۔انہاں آکھیا جو پاکستان امن سانگے 6500سکیورٹی عملہ اتے 21000شہریاں دی قربانی ڈتی اے۔دہشت گردی دے مراکز کوں ختم کر ڈتا گئے اتے پاکستان کوں مکمل طور محفوظ بنڑایا ویندا پئے ۔انہاں آکھیا جو دنیا کوں پر امن بنڑاونڑ سانگے پاکستان 120ارب ڈالرز دا معاشی ضیان تھےے۔