کورونا وائرس پاروں سامنڑے آندی صورتحال ہک آزمائش اے، اساڈی قوم رل تے ایندا مقابلہ کریسی تے ہک عظیم قوم بنڑ تے ابھرسی ، وزیراعظم عمران خان

ملک دے غریب اتے کمزور طبقیں دا خصوصی خیال رکھنڑاں ہوسی ایں مقصد کیتے کورونا ریلیف فنڈ اتے ٹائیگر فورس دا کردار بہوں اہم اے ، عوام ڈسپلن قائم کرے تے یقین رکھے جو انہاں دا پیسہ ضائع نہ تھیسی
اسلام آباد ۔ یکم اپریل (اے پی پی) وزیراعظم عمران خان آکھیے جو کورونا وائرس پاروں سامنڑے آندی صورتحال ہک آزمائش اے، اساڈی قوم رل تے ایندا مقابلہ کریسی تے ہک عظیم قوم بنڑ تے ابھرسی ۔ ملک دے غریب اتے کمزور طبقیں دا خصوصی خیال رکھنڑاں ہوسی ایں مقصد کیتے کورونا ریلیف فنڈ اتے ٹائیگر فورس دا کردار بہوں اہم اے ، عوام ڈسپلن قائم کرے تے یقین رکھے جو انہاں دا پیسہ ضائع نہ تھیسی۔اے گال انہاں بدھ کوں اتھاں اے آر وائی نیٹ ورک ولوں وزیراعظم کوں کورونا ریلیف فنڈ دے حوالے نال ٹیلی تھون ٹرانسمیشن دے دوران آکھی ۔ وزیراعظم آکھیے جو کورونا وائرس پاروں پوری دنیا اچ غیر معمولی صورت حال پیدا تھئی اے اے اوکھا ویلھا ضرور اے لیکن میکوں یقین اے جو اساڈی قوم ایں آزمائش اچ ہک عظیم قوم بنڑ تے ابھرسی ۔انہاں آکھیے جو کوئی وی جنگ کوئی قوم کلہیں نی جت سگدی ،ایں کیتے پوری قوم دا ساتھ ہووے تے کورونا دے خلاف جنگ وی ہک مٹھی تے لڑسی۔ایں مقصد کیتے اساں ساریں کوں کردار ادا کرنڑاں ہوسی ۔ وزیراعظم آکھیے جو او حکومت دے وسائل دی کمی دی باوجود ملکی تاریخ دا ساریں توں وڈا ریلیف پیکج ڈتے تے آندے ڈینھاں اچ ایں وبا دی کیا صورت حال ہوسی ایندا دنیا اچ کہیں کوں اندازہ کائنی ۔ انہاں آکھیے جو ایں تناظر اچ مستقبل دی پیش بندی کریندے ہوئیں اساں کورونا ریلیف فنڈ اتے کورونا ریلیف ٹائیگر فورس دے قیام جیہوجے اقدامات کیتن ۔ وزیراعظم آکھیے جو ایں وباءتوں بچنڑ کیتے احتیاط ضروری اے تاں جو لاک ڈاﺅن نال ملک دے غریب تے جہاڑ تے کم کرنڑ آلے لوک اوکھے تھی گن ،انہاں تئیں مناسب راشن تے ضروری رقم نہ پجائی ونج سگی تاں ہک نواں بحران جنم گھن سگدے ۔انہاں آکھیے جو ایجھے کہیں وی بحران توں بچنڑ کیتے کورونا ریلیف فنڈز تے ٹائیگر فورس دا قیام عمل اچ گھن آیا گے ،ایںفنڈ توں حاصل تھیونڑ آلی رقم متاثرین دی امداد کیتے خرچ کیتی ویسی جڈاں جو کورونا ریلیف ٹائیگر فورس دے رضا کار ایجھے مستحق اتے ضرورت مند لوکاں دی نشاندہی کرنڑ دے نال نال انہاں تئیں مالی امداد پجاونڑ اچ وی مدد کریسن ۔ انہاں آکھیے جو چین دی لاک ڈاﺅن دی حکمت عملی ایں سانگے کامیاب رہی اے جو انہاں متاثرہ علاقے دے لوکاں کوں گھراں اچ امداد پجائی انہاں ڈے وسائل ہن تے انتظام وی ہئی تاں جو پاکستان دے حالات مختلف ہن ایں کیتے کورونا ریلیف فنڈ اتے کورونا ریلیف فورس دی مدد توں اے کم بہتر انداز نال سرانجام ڈتا ونج سگسی ۔ وزیراعظم آکھیے جو ٹائیگر فورس سرکاری اداریں دی معاونت کریسی۔ حکومت احساس پروگرام دے تحت 150 ارب روپے مستحقین کوں ڈیسی لیکن ایں پروگرام اچ رجسٹرڈ لوکاں دی تعداد ہک کروڑ 20 لکھ اے جڈاں جو کورونا پاروں 8 توں 10 کروڑ تھیونڑ دا امکان اے ۔ کورونا ریلیف فنڈ اتے ٹائیگر فورس دے ذریعے انہاں لوکاں کوں امداد ڈتی ویسی۔ انہاں آکھیے جو کورونا ٹائیگر فورس دے ذریعے ملک اچ مزدوراں اتے محنت کشاں دا ڈیٹا مرتب تھی سگے ۔ قوم کوں مطمئن ہوونڑاں چاہیدے جو انہاں سارے معاملات دی نگرانی میں خود کرینداں پیاں ۔