حکومت دا کرونا پاروں تعلیمی ادارے26 نومبر توں 24 دسمبر تئیں بند رکھݨ دا اعلان، 25 دسمبر توں 10 جنوری تئیں سردیاں دیاں چھٹیاں ہوسن، وزیر تعلیم شفقت محمود

اسلام آباد۔23نومبر(اے پی پی)وفاقی وزیر تعلیم و پیشہ وارانہ تربیت شفقت محمود آکھیے جو ملک اچ ودھدے کورونا کیساں موجب تعلیمی ادارے 26 نومبر توں 24 دسمبر تئیں بند رہسن اتے 25 دسمبر توں 10 جنوری تئیں سردیاں دیاں چھٹیاں ہوسن بھل ووکیشنل سنٹرز کھلے رہسن اتے انٹری ٹیسٹ و ملازمتاں کیتے امتحانات دی اجازت ہوسی، یونیورسٹیاں اتے سارے تعلیمی ادارے آن لائن تعلیم ݙیسن، یونیورسٹی ہاسٹلز اچ ہک ترہائی طلبا کوں راہݨ دی اجازت ہوسی۔ اے فیصلہ وفاقی وزیر تعلیم شفقت محمود دی صدارت اچ بین الصوبائی وزرائے تعلیم دے این سی او سی اچ تھیوݨ آلے اجلاس اچ کیتا ڳئے ۔ اجلاس دے بعد وزیراعظم دے معاون خصوصی قومی صحت ڈاکٹر فیصل سلطان دے کٹھے شفقت محمود تفصیلات ݙسیندے ہوئیں آکھیا جو سارے تعلیمی ادارے جنہاں اچ سکول ، یونیورسٹیاں، ٹیوشن سنٹر 26 نومبر توں 24 دسمبر ئیں بند کرݨ دا فیصلہ کیتا ڳئے اتے 25 دسمبر توں 10 جنوری تئیں موسم سرما دی چھٹیاں ہوسن۔ انہاں آکھیا جو تعلیمی ادارے 11 جنوری توں ولا اپݨی تعلیمی سرگرمیاں شروع کریسن جݙانڄو ایں توں پہلے جنوری دے پہلے ہفتے اچ کورونا دی صورتحال دے جائزے کیتے ہک جائزہ اجلاس وی تھیسی جیندے اچ صورتحال دی سؤرتحال تے ہک ولا ول غور کیتا ویسی۔ انہاں آکھیے جو یونیورسٹیاں اچ فوری طورتے آن لائن تعلیمی سرگرمیاں شروع کیتاں ویسن۔ انہاں آکھیا جو یونیورسٹی ہاسٹل ہک تہائی طلباءکوں رہݨ دی اجازت ہوسی جیندےاچ او طلباءجو دور دراز علاقیاں توں ہن جتھاں انٹرنیٹ دی سہولت کائنی اتے غیر ملکی طلباءشامل ہوسن۔ ہاسٹل اچ رہݨ دی اجازت دے بارے یونیورسٹیز آپ فیصلہ کریسن۔ انہاں آکھیا جو پی ایچ ڈی کرݨ آلے طلبا اتے، جیڑھے طلبا اپݨے پراجیکٹ کیتے لیب اچ کم کریندے پئن انہاں کوں وی یونیورسٹی آوݨ دی اجازت ہوسی۔ وفاقی وزیر تعلیم آکھیا جو ہنر دی تعلیم ݙیوݨ آلے ادارے جتھاں طلبا کوں فیکٹریاں اتے ورکشاپ اچ تعلیم ݙتی ویندی پئی اے او وی اپݨیاں تعلیمی سرگرمیاں جاری رکھسن۔ انہاں آکھیا جو سکولاں اچ اساتذہ کوں آوݨ دی اجازت ہوسی اتے ایندے بارے  سکول آپ فیصلہ کریسن جو انہاں کوں کتنے استاداں دی لوڑھ اے۔ وفاقی وزیر آکھیے جو تعلیمی بورڈز دے امتحانات مارچ اپریل دی بجائے مئی جون اچ کراوݨ دی تجویز اے اتے تعلیمی نقصان کوں پورا کرݨ کیتے گرمی دی چھٹیاں منسوخ کرݨ اتے نواں تعلیمی سال اگست تک ڳھن ونڄݨ دی وی تجویز اے۔ ایں موقع تے وزیر اعظم دے معاون خصوصی قومی صحت ڈاکٹر فیصل سلطان آکھیے جو گزریل کجھ ݙینھ اچ ملک اچ کورونا دی صورتحال تیزی نال خراب تھیندی پئی اے اتے کیساں دے مثبت آوݨ دی اوسط 7 فیصد تئیں ودھ ڳئی اے۔ انہاں آکھیا جو اے انتہائی اہم موقع اے جو ایندے بارے کوئی فوری فیصلہ کیتا ونجے  تانجو بیماری کوں روکیا ونڄ سڳے، اینجھی صورتحال پاروں ہی اے فیصلے کیتے ویندے پئن۔اجلاس اچ سارے صوبیاں دے وزرائے تعلیم آن لائن شرکت کیتی اتے اپݨے اپݨے صوبیاں اچ کورونا دی صورتحال اتے تعلیمی سرگرمیاں نال اجلاس کوں ݙسایا۔ انہاں ایں صورتحال اچ تعلیمی سرگرمیاں کیتے مختلف تجاویز ݙتیاں، اتے وزارت صحت ولوں کورونا دی صورتحال تے اجلاس کوں بریفنگ ݙتی۔