حکومت دا تعمیراتی شعبہ کیتے وݙے مراعاتی پیکیج دا اعلان، پورے ملک اچ تعمیراتی سرگرمیاں شروع

اسلام آباد۔6نومبر(اے پی پی)پاکستان تحریک انصاف دی حکومت ولوں تعمیراتی شعبے کیتے ہک وݙے مراعاتی پیکیج دے اعلان توں بعد پورے ملک اچ وݙے پیمانے تے تعمیراتی سرگرمیاں شروع تھی گئن اتے غربت اتے بے روزگاری اچ واضح ڳھٹکی متوقع اے۔ نیا پاکستان ہاؤسنگ اتھارٹی موجب حکومت نیا پاکستان ہاؤسنگ پروگرام کیتے 30 ارب روپے سبسڈی رکھی اے۔ ڳھٹ آمدن آلے طبقات کیتے بݨݨ آلے پہلے ہک لکھ گھراں تے حکومت ہر گھر تے 3 لکھ روپے سبسڈی ݙیسی۔ ایویں ہی گھٹ لاگت دے گھراں کیتے ٹیکس دی شرح اچ 90 فیصد چھوٹ، پنڄ مرلہ گھر تے پنڄ فیصد تے ݙاہ مرلہ گھر تے ست فیصد منافع تے قرضہ دی سہولت ݙتی ڳئی اے۔ ایں سانڳے بینک قرضے جاری کریندے پین اتے بینکاں ”میرا پاکستان ۔ میرا گھر“ سکیم دے تحت لوکیں کوں قرض کیتے سہولت ݙیوݨ کیتے ڈیسک وی بݨا ݙتے، ڄتھاں لوکاں کوں قرض بارے معلومات، مطلوبہ دستاویزات اتے قرض دی واپسی دے شیڈول بارے معلومات ݙتیاں ویندن۔ سکیم دے تحت سارے پاکستانی درخواست ݙے سڳدین۔ قرض ملݨ تے پہلے پنڄ سال کیتے 10 لکھ روپے تے ماہانہ قسط 6600 روپے، 20 لکھ روپے تے 13199 روپے، 30 لکھ روپے تے 19799 روپے، 40 لکھ روپے دے قرض تے 31012 روپے اتے 50 لکھ روپے دے قرض تے 38765 روپے ݙیوݨے پوسن۔ اسکیم اچ 3 کیٹیگریز ہن جیندے اچ پہلی کیٹیگری نیا پاکستان ہاؤسنگ اینڈ ڈو پلمنٹ اتھارٹی (NAPHDA)دے منصوبیاں دی اے جیندے اچ 850 سکوائر فٹ کورڈ ایریا دے پنڄ مرلے دے گھر یا اپارٹمنٹ شامل ہن۔ ݙوڄھی کیٹیگری اچNon – NAPHDA دے منصوبے شامل ہن جیڑھے 850 سکوائر فٹ کورڈ ایریا دے پنچ مرلے دے گھر یا اپارٹمنٹ دے ہوسن۔ ایویں تریڄھی کیٹیگری اچ Non – NAPHDA منصوبے ہین جیڑھے 125 مربع گز توں ودھ 10 مرلے دے گھراں دے ہوسن اتے ایندا کورڈ ایریا 850 مربع فٹ توں 1100 مربع فٹ ہوسی۔ پہلی اتے ݙوڄھی کیٹیگری دے گھر یا اپارٹمنٹ دی ودھ توں ودھ قیمت 35 لکھ روپے اتے تریڄھی کیٹیگری دے گھر یا اپارٹمنٹ دی قیمت 60 لکھ روپے ہوسی۔ ایں سکیم دے تحت پہلی کیٹیگری کیتے 27 لکھ روپے، ݙوڄھی کیٹیگری کیتے ودھ توں ودھ 30 لکھ روپے اتے تریڄھی کیٹیگری کیتے 50 لکھ روپے تئیں دا قرضہ ݙتا ویسی۔ بینکاں ایں سانڳے 378 ارب روپے دی رقم رکھی اے۔ سارے متعلقہ ڈوپلمنٹ اتھارٹیز ولوں ڳھٹ ویلھے اچ منصوبیاں دی منظوری کیتے این او سی دی پروسیسنگ ون ونڈو پورٹل توں تھیندی پئی اے۔ وفاقی کابینہ انکم ٹیکس آرڈیننس 2001ءاتے فنانس ایکٹ 1989ءاچ ترامیم کر تے تعمیراتی صنعت کوں ٹیکس مراعات ݙیوݨ کیتے آرڈیننس منظور کیتے اتے تعمیرات دے شعبہ اچ ڳھٹ آمدن آلے طبقات اتے ملازماں کیتے ہاؤسنگ پراجیکٹ کوں ودھ مراعات ݙتیاں ویسن جیندے اچ فکسڈ ٹیکس دا نظام اتے ڳھٹ شرح سود تے قرضے ݙیوݨ سودھا ٻیاں سہولتاں شامل ہوسن۔ اینجھے اقدامات نال تعمیراتی مٹیریل دی قیمتاں اچ ڳھٹکی تھیسی اتے ترقی دا پہیہ ولا چلݨ شروع تھی ویسی۔ اے وزیراعظم عمران خان دی چنگی قیادت دیاں پالیسیاں دا نتیجہ اے، حکومت دے انہاں اقدامات نال غریب لوک اپݨے گھر اچ رہندے ہوئیں کرایہ دی جاہ تے گھر دی قسط ادا کر تے اپݨے گھر دا خواب پورا کر سڳسن ۔